Nga operacioni i quajtur “Tempulli”, është arrestuar në Prrenjas Maksim Kozmai, 62 vjeç. Gjatë kontrollit fizik dhe në banesë, autoritetet zbuluan doza të dyshuara të kanabisit, sugjeruar se ai mund të kishte qenë duke ua shpërndarë në lagjet e Prrenjasit. Si pjesë e provave materiale janë sekuestruar 3 celularë dhe sasia e lëndës narkotike.
Njoftimi i policisë:
Prrenjas/Vijon megaoperacioni policor i koduar “Tempulli”, për goditjen e veprimtarisë kriminale në fushën e narkotikëve.
Arrestohet në flagrancë 1 shtetas, të cilit Policia, gjatë kontrollit fizik dhe kontrollit në banesë, i gjeti lëndë narkotike kanabis të ndarë në doza, gati për shitje.
Dozat e lëndës narkotike, ky shtetas i ndante në banesë dhe më pas i shiste në lagje të ndryshme në Prrenjas.
Sekuestrohen lënda narkotike kanabis, një shumë parash e dyshuar e përfituar nga kjo veprimtari e kundërligjshme dhe 3 celularë.
Specialistët e Seksionit për Hetimin e Narkotikëve të DVP Elbasan, në bashkëpunim me shërbimet e Forcës së Posaçme Operacionale dhe shërbimet e Stacionit të Policisë Prrenjas, në vijim të veprimeve intensive operacionale të kryera në kuadër të megaoperacionit policor mbarëkombëtar, antidrogë, të koduar “Tempulli”, pasi kanë siguruar informacion se një shtetas shiste lëndë narkotike në Prrenjas, kanë organizuar punën për kapjen dhe vënien e tij përpara përgjegjësisë ligjore.
Si rezultat, shërbimet e Policisë kanë kapur në flagrancë shtetasin M. K., 62 vjeç, banues në Prrenjas, të cilit gjatë kontrollit fizik i kanë gjetur një sasi lënde të dyshuar narkotike kanabis, të ndarë në doza, gati për shitje.
Gjithashtu, gjatë kontrollit në banesën e këtij shtetasi, kanë gjetur një tjetër sasi lënde narkotike kanabis të ndarë në doza.
Lënda narkotike, një shumë parash dhe 3 celularë u sekuestruan në cilësinë e provës materiale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
