Me debate të forta u zhvillua mbledhja e Komisionit për Burimet Natyrore, Infrastrukturën dhe Zhvillimin e Qëndrueshëm, ku pritej prezantimi i projektbuxhetit të Ministrisë së Infrastrukturës. Ministrja Belinda Balluku, e cila ndodhet nën hetim nga SPAK për aferën e tunelit të Llogarasë, nuk u paraqit personalisht, duke dërguar në vend të saj zv.ministren. Ky veprim shkaktoi irritim të deputetëve opozitarë, të cilët kërkuan praninë e saj.

Gazment Bardhi, deputet i PD-së, deklaroi:
“Në komisione merr pjesë ministrja, jo zv.ministra. Nëse nuk vjen të japë llogari në komision, do të japë në SPAK. Projektbuxheti ka procedura të veçanta dhe kërkon domosdoshmërisht prezencën e ministrit përgjegjës. Ministrja duhet të ishte këtu për të bindur komisionin se mund t’i besojmë fondeve, ndërkohë që është nën hetim për një akuzë konkrete. Fshihet si kriminele.”

Opozita e konsideron mungesën e Ballukut jo vetëm të paprecedentë, por edhe një shenjë mosrespektimi të institucioneve, duke theksuar nevojën që ministrja të përballet me pyetjet e komisionit dhe të japë sqarime mbi përdorimin e fondeve publike.