Opozita ka zhvilluar një protestë të fortë përpara Bashkisë së Tiranës, duke kërkuar dorëheqjen e kryebashkiakut Erion Veliaj, ndërsa vazhduan akuzat për inceneratorin dhe për 5D, çështje të cilat janë në hetim nga SPAK. Folësit para protestuesve theksuan përfshirjen e Veliajt dhe qeverisë në skandale të ndryshme, duke kërkuar drejtësi.

Një prej folësve, Neritan Liçaj, u shpreh ashpër kundër mënyrës se si udhëhiqen institucionet e vendit. Ai theksoi: “S’ke një rilindas me tru, gjithë copa mishi janë. Unë doja të flisja për një gjë që është vërtet shumë e dhimbshme. Ne udhëhiqemi që nga 1945 nga disa njerëz që nuk kanë fituar kurrë.”

Liçaj vazhdoi duke theksuar se partia në pushtet ka arritur të ruajë fuqinë përmes manipulimeve dhe presionit ndaj popullit: “Erdhën në Shqipëri si gjoja fronti nacionalçlirimtar. Në 92 i doli frika popullit nga sigurimi dhe nga masakrat e Enver Hoxhës dhe ja u shkundi votën mirë. Në 96 ja u shkundi akoma më mirë.”

Ai gjithashtu kujtoi periudhën e pas vitit 1997 dhe akuzoi qeverinë e asaj kohe për lidhje me bandat kriminale dhe për keqpërdorimin e kursimeve të qytetarëve për të mbështetur ato. “Furnizuan bandat me kursimet tona. Dhe fitoi shoku Fatos i cili në vend që të hetonte bandat kriminale që vranë punonjës shteti, ai nuk bëri asgjë.”

Liçaj e mbylli fjalimin e tij duke thënë se pa largimin e atyre që kanë mbajtur pushtetin në duar për dekada, Shqipëria nuk mund të ecë përpara. “Pa dalë këta qelbësirat e ’41 nga historia e Shqipërisë, nuk do avancojmë. Prandaj me 11 maj shkundeni votën.”

Protesta vazhdon të jetë një shprehje e mëtejshme e kundërshtisë ndaj qeverisë dhe kërkesës për ndryshim në politikën e vendit.