Më 20 janar, në ditën e inaugurimit të presidentit të zgjedhur të SHBA-së, Donald Trump, shumë organizata joqeveritare, përfshirë grupe ambientaliste si “Greenpeace”, “Miqtë e Tokës” dhe “Ekologët në Veprim”, do të largohen nga platforma X (ish-Twitter). Këto organizata janë mes qindra grupesh dhe mijëra individëve që kanë vendosur të bojkotojnë platformën, duke e akuzuar atë si një kërcënim për demokracinë.

Edhe Konferenca e Rektorëve të Universiteteve Spanjolle është ndër organizatat që do të ndalojë përdorimin e X. Në një deklaratë të përbashkët, grupet shprehën shqetësimin e tyre për drejtimin që ka marrë platforma nën pronësinë e Elon Musk.

“Platformat e mediave sociale nuk kanë qenë kurrë perfekte, por qëndrimi i X është i papranueshëm për një platformë ku pozicionet e ndryshme duhet të trajtohen në mënyrë të barabartë,” – thuhet në deklaratë.

Musk është kritikuar për promovimin e diskurseve të ekstremit të djathtë dhe për ndërhyrjen në politikën evropiane. Ai ka bërë deklarata të debatueshme për çështje politike në Gjermani, Itali dhe Britani, duke përfshirë edhe mbështetjen për partinë e ekstremit të djathtë Alternativa për Gjermaninë (AfD) përpara zgjedhjeve të parakohshme federale që mbahen në shkurt.

Shefi i Tesla-s dhe SpaceX bleu Twitter-in për 44 miliardë dollarë në vitin 2022 dhe më pas e riemëroi X. Kritikat ndaj tij janë shtuar pas lajmeve se ai do të shërbejë si këshilltar i presidentit Trump, duke rritur frikën për ndikimin e tij në politikën globale dhe përdorimin e platformës për qëllime ideologjike.