Kryetari i degës nr. 2 të Partisë Demokratike në qarkun e Durrësit, Osman Stafa, ka hedhur akuza të forta për manipulimin e procesit zgjedhor të 11 majit, duke deklaruar se vjedhja e votës ka ndodhur në të gjithë vendin dhe se demokracia është goditur nga një “skenar i mirëorganizuar”.

I ftuar në një emision televiziv, Stafa nënvizoi se në zonat Xhafzotaj dhe Romanat ka prova dhe fakte konkrete për manipulimin e votës, dhe për këtë arsye do t’i kërkojë Komisionit Qendror të Zgjedhjeve (KQZ) të verifikojë pamjet filmike të kamerave të sigurisë në këto qendra votimi.

“Më 11 maj në Shqipëri nuk pati zgjedhje, por vetëm votime. Zgjedhjet janë vjedhur në të gjithë vendin. Ka pasur qytetarë që e kanë pranuar se kanë shitur votën, por kanë pasur frikë të denoncojnë”, tha ai.

Stafa shtoi se Porti i Durrësit është sot nën kontrollin e krimit dhe pushtetit, ndërsa vuri në dukje se prej tre vitesh nuk është regjistruar asnjë goditje ndaj trafikut të drogës në hyrje apo dalje.

Ai paralajmëroi se shumë shpejt do të depozitojë kërkesën zyrtare në KQZ për hetim të thelluar të zonave problematike, duke e cilësuar procesin si një projekt të errët që ka goditur sistemin demokratik në vend.