Bota e muzikës është zhytur në zi pas lajmit për ndarjen nga jeta të Ozzy Osbourne, vokalistit ikonik të grupit legjendar të heavy metal, Black Sabbath. Ai u nda nga jeta të martën, në moshën 76-vjeçare, vetëm pak javë pas koncertit të fundit të grupit në qytetin e tij të lindjes, Birmingham.

Lajmi ka tronditur jo vetëm fansat në mbarë globin, por edhe bashkëpunëtorët dhe artistët që e panë Osbourne-n si një burim frymëzimi dhe ikonë të pakrahasueshme të muzikës rock.

“Humbëm vëllain tonë”, tha bashkëthemeluesi Tony Iommi, ndërsa basisti Geezer Butler solli në mendje emocionet e koncertit të fundit. Bill Ward, bateristi i grupit, ndau një foto të vjetër me fjalët: “Një pjesë e jetës sime iku me të”.

Osbourne, i njohur për zërin unik, prezencën elektrizuese në skenë dhe jetën e trazuar, ishte më shumë se një frontman – ishte simboli i një epoke. Grupi Black Sabbath, i formuar në fund të viteve ’60, tronditi botën e muzikës me këngë si Paranoid, War Pigs dhe Iron Man, duke vendosur themelet e zhanrit heavy metal.

Pas ndarjes nga grupi në vitin 1979, për shkak të konflikteve të brendshme, Osbourne nisi një karrierë të suksesshme si solo artist. Albumi i tij i parë u hap me këngën Crazy Train, që u kthye menjëherë në një himn të rock-ut dhe shenjë dalluese të trashëgimisë së tij muzikore.

Në vitet 2000, ylli i muzikës u rikthye në vëmendjen e publikut përmes reality show-t të MTV-së, The Osbournes, ku u njoh nga një brez i ri si një baba i dashur dhe shpesh komik, larg imazhit të tij të egër në skenë.

Grupi Metallica reagoi me dhimbje: “Është e pamundur të përshkruhet me fjalë se çfarë ka nënkuptuar Ozzy Osbourne për ne. Hero, ikonë, pionier, frymëzim, mentor dhe, mbi të gjitha, mik”.

Osbourne la pas gruan e tij, Sharon, një bashkëshorte dhe menaxhere e përkushtuar, dhe gjashtë fëmijë nga dy martesa.

Vdekja e tij shënon fundin e një epoke, por trashëgimia që la pas do të jetojë përjetë në historinë e muzikës rock dhe zemrat e miliona fansave në mbarë botën.