Në Panairin e Teknologjisë në Hanovër të Gjermanisë, Zona e Lirë Ekonomike në Tiranë ka shkëlqyer si një destinacion i preferuar për kompanitë gjermane. Kryetari i Bashkisë së Tiranës, Erion Veliaj, duke prezantuar instalacionin e Bashkisë në panair, theksoi se kompanitë gjermane do të njihen me avantazhet dhe lehtësitë që ofron vendi për të bërë biznes.
Veliaj shprehu entuziazmin për interesin e madh që ka shkaktuar Zona e Lirë Ekonomike në Tiranë, duke theksuar se synohet të krijojë bashkëpunime të reja me kompanitë gjermane, sidomos ato që ofrojnë punë të mirëpaguara në fushën e kodimit.
Kryebashkiaku gjithashtu bëri të ditur se Bashkia e Tiranës planifikon të vazhdojë fushatën e marketingut të agresiv në panairet e ardhshme, duke promovuar klimën e favorshme të biznesit në Tiranë. Ai gjithashtu shprehu synimin për të vazhduar bashkëpunimin e suksesshëm me panairin e Berlinit për të zhvilluar turizmin në Tiranë dhe në Shqipëri.
“Ka një interes të jashtëzakonshëm për zonën e lirë ekonomike, për të cilën Tirana ka licencën dhe ka filluar punën. Mezi presim që 5-7 mijë vende të reja pune, që do të hapen, të jenë të lidhura edhe me Gjermaninë dhe pagat e mirëpaguara të kompanive gjermane. Kemi filluar një fushatë agresive marketingu në të gjitha panairet e mundshme, për të thënë që në Tiranë ka diell, ka dëshirë për punë dhe hapësira e lehtësira të nevojshme nga qeveria dhe nga bashkia, si për taksa, si edhe për të bërë biznes. Mezi presim që të vazhdojmë punën e mirë të nisur me Lufthansa Industry Solutions dhe me disa kompani të tjera, që e kanë kthyer Tiranën në epiqendrën e kodimit, të punëve të mirëpaguara dhe të punëve që janë e ardhmja e punësimit”, u shpreh Veliaj.
Veliaj ftoi qytetarët shqiptarë në Gjermani të vizitojnë instalacionin e Bashkisë së Tiranës në Panairin e Teknologjisë dhe theksoi besimin e tij në potencialin e marrëdhënieve afatgjata dhe të suksesshme të biznesit mes dy vendeve.
