Kabineti qeveritar gjerman ka miratuar propozimin e Ministrit të Shëndetësisë, Jens Spahn për ta vlerësuar pandeminë në bazë të treguesve të rinj.

Qeveria gjermane ka filluar rishikimin e Ligjit për Mbrojtjen nga Infektimet.

Incidenca shtatë ditore nuk do të jetë më faktori vendimtar në trajtimin e pandemisë. Në vend të kësaj, formulimi i propozuar thotë se në veçanti numri i pacientëve me korona të pranuar në klinikat rajonale për 100.000 banorë brenda shtatë ditëve do të ishte “kriteri matës thelbësor” për marrjen e masave mbrojtëse.

Në propozim thuhet më tej se përveç shtrimeve në spital, “treguesit e mëtejshëm” duhet të merren parasysh në vlerësimin e incidencës së infektimeve.

Përmenden numri i infektimeve të reja për 100.000 banorë në shtatë ditë – të diferencuara sipas grupmoshave -, kapacitetet në dispozicion të kujdesit intensiv dhe numri i personave të vaksinuar.

Qeveritë e landeve atëherë duhet të jenë në gjendje të përcaktojnë vlerat e pragut për të gjithë treguesit e listuar, duke marrë parasysh kapacitetet përkatëse të kujdesit spitalor.