Vatikani ka ndarë detaje prekëse rreth 24 orëve të fundit të Papa Françeskut, i cili ndërroi jetë të hënën në mëngjes, pas një përkeqësimi të papritur të gjendjes së tij shëndetësore. Sipas raportimeve të BBC-së, Papa ishte i shqetësuar për paraqitjen e tij të fundit publike në ballkonin e Bazilikës së Shën Pjetrit të dielën, një moment që preku zemrat e miliona besimtarëve.
“A mendon se mund ta bëj këtë?” — e kishte pyetur Papa infermierin e tij personal, Massimiliano Strappetti, vetëm pak çaste përpara se të dilte para turmës. Strappetti e siguroi dhe e qetësoi Atin e Shenjtë, i cili u shfaq më pas në ballkon, duke dhënë bekimin e tij të fundit për popullin.
Pasi u kthye në dhomën e tij, Papa Françesku falënderoi me mirënjohje infermierin: “Faleminderit që më ktheve në shesh.”
Mbrëmjen e së dielës, ai pushoi dhe konsumoi darkën në mënyrë të qetë. Por mëngjesin e së hënës, rreth orës 05:30, gjendja e tij shëndetësore u përkeqësua ndjeshëm. Vetëm një orë më vonë, sipas Vatikanit, Papa ra në koma.
“Ata që ishin pranë tij në ato momente thonë se ai nuk ka vuajtur. Ishte një vdekje pa pritje të gjata apo shumë zhurmë,” thuhet në deklaratën zyrtare të Vatikanit.
Vdekja e Papës Françesku shënon fundin e një epoke për Kishën Katolike, pasi ai ishte një figurë e dashur dhe e afërt me njerëzit, i njohur për përulësinë, mesazhet për drejtësi sociale dhe përkushtimin ndaj paqes. Mbarë bota pritet të mbajë zi për këtë humbje të madhe shpirtërore.
