Kryetari i Bashkisë së Tiranës, Erion Veliaj, ka shpallur se për herë të parë do të zhvillohet “Parada e Shqiptarëve” në kryeqytetin shqiptar më 28 Nëntor. Aktiviteti organizohet në bashkëpunim me “Albanian Roots” dhe do të mbahet në bulevardin “Dëshmorët e Kombit”. Kryetari Veliaj fton të gjithë qytetarët të bashkohen në këtë ngjarje historike për të shënuar krenarinë kombëtare.

“Këtë 28 Nëntor ne, shqiptarët, festojmë 111 vjetorin e Pavarësisë së Shqipërisë. Është një nga ato ditë kur dritaret e shtëpive tona skuqen nga flamujt kuqezi, kur zemra e çdo shqiptari rreh njësoj, dhe secili prej nesh ka dëshirë ta thotë me zë të lartë: “O sa mirë me qenë Shqiptar”! E ku ka më bukur se sa Ditën e Flamurit ta festojmë të gjithë bashkë, këtu, në Tiranë! Prandaj, këtë vit, kemi menduar të organizojmë diçka krejt të veçantë, që do ta mbajmë mend gjatë. Në Bulevardin “Dëshmorët e Kombit”, m’u në zemër të kryeqendrës së shqiptarëve, vjen “Parada e Shqiptarëve” – një festë e paharruar për Ditën e Pavarësisë, plot ngjyra e hare, me pjesëmarrjen e shqiptarëve nga të gjitha qytetet shqipfolëse të rajonit, për t’u mbledhur së bashku në një paradë kushtuar historisë, trashëgimisë dhe kulturës sonë”, thotë Veliaj, ndër të tjera në mesazhin e postuar në rrjetet sociale.