Doganat greke kanë paralajmëruar një grevë 48 orëshe nga data 2 prill në orën 08:00 të mëngjesit deri më 4 prill në orën 08:00 të mëngjesit.

Si rezultat i kësaj greve, lëvizja e mjeteve nga dhe drejt Greqisë në të gjitha pikat doganore që lidhin vendin me vendet e rajonit do të paralizohet totalisht. Probleme të mëdha pritet të ketë edhe për lëvizjen e mallrave në portet dhe aeroportet e vendit.

Doganat greke, që janë portat hyrëse për vendin tonë, kanë njoftuar se stafi në to do të marrë pjesë në grevë. Gjatë 48 orëve të grevës, nuk do të lejohet lëvizja e asnjë mjeti udhëtarësh dhe kamioni nga dhe drejt Greqisë.

Vetëm këmbësorët që kalojnë pa bagazhe dhe çanta do të lejohen të kalojnë.

Sindikata e doganave ka deklaruar se vendimi për fillimin e grevës ishte i pa shmangshëm pasi qeveria nuk ka përmbushur asnjë nga pikat e kërkesave të tyre. Kjo periudhë e grevës përkon me ditët pas pashkës katolike, gjatë të cilave pritet të ketë një lëvizje të shtuar të qytetarëve në dogana, si dhe një kërkesë të shtuar për mallra.