Katër shkurti shënohet çdo vit si Dita Botërore e Kancerit, një ditë për të rritur ndërgjegjësimin mbi parandalimin, diagnostikimin dhe trajtimin e sëmundjes që prek miliona njerëz në mbarë botën.

Ministria e Shëndetësisë nënvizon se kontrolli dhe diagnostikimi i hershëm janë çelësi për një jetë më të shëndetshme. “Çdo kontroll, çdo informacion i duhur dhe çdo hap drejt kujdesit të rregullt mund të bëjë ndryshimin,” thuhet në një postim në Facebook, ku theksohet rëndësia e parandalimit si mënyra më efektive e trajtimit.

Mjeku Euglent Hoxha, onko-obstër-gjinekolog në QSUT, shpjegon se kanceri i qafës së mitrës është më i shpeshtë në fushën e kancerit gjinekologjik. “Për një periudhë disavjeçare, numri i rasteve të reja ka qenë 75-80 në vit. Sa më herët të zbulohet, aq më të mëdha janë mundësitë e kurimit dhe trajtimit,” tha Hoxha.

Historia e Ditës Botërore të Kancerit nis në vitin 2000, në Samitin e parë Botëror Kundër Kancerit në Paris. Në këtë event u nënshkrua dokumenti “Statuti i Parisit Kundër Kancerit”, që përmban 10 artikuj dhe përshkruan angazhimin global për përmirësimin e kujdesit, cilësisë së jetës së pacientëve dhe rritjen e investimeve në kërkimin, parandalimin dhe trajtimin e kancerit.

Kjo ditë synon të kujtojë rëndësinë e ndërgjegjësimit, edukimit dhe veprimit të hershëm në luftën kundër një prej sëmundjeve më sfiduese të shekullit të 21-të.