Një ngjarje e mundshme e rëndë kriminale është parandaluar nga Policia e Vlorës, pas kontrolleve intensive të zhvilluara në aksin rrugor dhe në territorin e fshatit Babicë e Madhe.

Sipas njoftimit zyrtar, gjatë veprimeve operative, forcat e policisë kanë ushtruar kontrolle të imtësishme për dy automjete që dyshohej se do të përdoreshin për kryerjen e një akti kriminal. Si rezultat, në një sipërfaqe ullishteje në Babicë e Madhe janë konstatuar të fshehura dy automjete të dyshuara të vjedhura, konkretisht një “Nissan” dhe një “Audi Q5”, të dyja me targa të huaja.

Gjatë kontrollit të zonës janë gjetur gjithashtu edhe tre bidona me lëndë djegëse (benzinë), çka forcon dyshimet se mjetet do të përdoreshin për një ngjarje të rëndë kriminale.

Automjetet dhe provat e sekuestruara janë dërguar për ekzaminime shkencore, ndërsa grupi i posaçëm hetimor i Drejtorisë Vendore të Policisë Vlorë, nën drejtimin e Prokurorisë, vijon hetimet për zbardhjen e plotë të rrethanave, identifikimin e autorëve dhe dokumentimin e veprës penale.

Policia thekson se operacioni është pjesë e masave parandaluese për garantimin e rendit dhe sigurisë publike në zonë.