Partia Demokratike do të mbledhë Kryesinë e saj të hënën në orën 18:00, një takim që vjen pas protestës së 7 Tetorit, ku opozita shpalli nisjen e mosbindjes civile. Në këtë mbledhje, e cila pritet të ketë një fjalim nga lideri Sali Berisha, do të merren vendime të rëndësishme për vazhdimësinë e aksionit opozitar.

Takimi i të hënës është planifikuar vetëm disa ditë para protestës së paralajmëruar nga deputetët demokratë më 23 Tetor, e cila do të mbahet para Parlamentit Europian në Strasburg. Kjo lëvizje ka si qëllim sensibilizimin e faktorit ndërkombëtar për kauzat e opozitës, duke përfshirë arrestimet politike të deputetëve demokratë dhe kërkesën për një qeveri teknike që mund të garantojë zgjedhje të lira dhe të ndershme.