Ka nisur zyrtarisht mitingu përmbyllës i fushatës elektorale të Partisë Demokratike, i zhvilluar në zonën e ish-Stacionit të Trenit në Tiranë, ku mijëra qytetarë janë mbledhur për të shprehur mbështetjen e tyre për këtë forcë politike.

Fushata që nisi më 11 prill në Tiranë, po përmbyllet po në këtë qytet, në atë që demokratët e cilësojnë si një shfaqje force dhe uniteti, me flamuj kombëtarë dhe të PD-së, bluza e kapele me numrin 1, dhe një entuziazëm të dukshëm nga të pranishmit.

Në skenën kryesore pritet të flasë Sali Berisha, lideri historik i PD-së dhe figurë qendrore e kësaj fushate, i cili do të japë mesazhin e fundit para zgjedhjeve. Një moment kyç do të jetë gjithashtu fjala e Chris LaCivita, strategu amerikan që ka mbështetur PD-në gjatë kësaj fushate, dhe që pritet të flasë për vizionin e PD-së për ndryshimin dhe një të ardhme më të mirë për Shqipërinë.