Partia Demokratike ka vendosur të ndajë 8 vende të sigurta për aleatët e saj në 6 qarqe të vendit. Ndër këta, Partia e Lirisë do të përfaqësohet me 4 kandidatë, ndërsa aleatë të tjerë do të kenë gjithashtu përfaqësim në listat e mbyllura.

Kandidatët kryesorë të aleatëve në listat e PD-së

Sipas burimeve, Ilir Meta, ndonëse aktualisht ndodhet në burg, pritet të jetë në listën e Tiranës.
Tedi Blushi do të garojë në Korçë, ndërsa Edmond Haxhinasto do të përfshihet në listën e Elbasanit.
Erisa Xhixho pritet të jetë në Fier.

Shpëtim Idrizi dhe Vangjel Dule, dy figura me mbështetje të madhe në Vlorë, do të jenë në listat e PD-së, por vetëm njëri prej tyre do të përfaqësojë këtë qark. Tjetri mund të spostohet në listën e Tiranës.

Ndërkaq, Fatmir Mediu (Partia Republikane) dhe Agron Duka (PAA) pritet të jenë kandidatë për deputetë në Tiranë dhe Durrës.

Nard Ndoka dhe Petrit Vasili, jo në lista të sigurta

Ndryshe nga aleatët e tjerë, Nard Ndoka nuk do të ketë një vend të sigurt në listën e PD-së, por do të duhet të garojë në listat e hapura të Tiranës dhe të provojë forcën e tij elektorale.

I njëjti skenar vlen edhe për Petrit Vasilin, i cili nuk ka siguruar një vend automatik, por do të duhet të dalë në garë të hapur.

Monika Kryemadhi, jashtë listave të Partisë së Lirisë

Një nga mungesat e bujshme pritet të jetë Monika Kryemadhi, e cila nuk do të jetë në listën e Partisë së Lirisë. Kjo vjen si pasojë e përplasjeve të saj me Ilir Metën, me të cilin ndodhet në proces divorci.

Afati i fundit për dorëzimin e listave në KQZ

Sipas gazetarit Isa Myzyraj, 12 marsi, ora 12:00, është afati përfundimtar për dorëzimin e listave në KQZ. Deri atëherë, Sali Berisha dhe ekipi i tij duhet të finalizojnë emrat për kandidatët për deputetë dhe t’ia paraqesin kryesisë së PD-së për miratim.