Partia Demokratike premton rritje të ndjeshme të pagave për mësuesit pas zgjedhjeve të 11 majit, duke i çuar ato mbi mesataren kombëtare dhe duke arritur një nivel prej 1200 eurosh.

Gjatë një takimi në Kamëz me arsimtarët, kryetari i PD-së, Sali Berisha, theksoi se kjo është një pjesë kyçe e programit të PD për të garantuar një trajtim të merituar për mësuesit dhe për të forcuar sistemin arsimor në Shqipëri.

“Shqipëria Madhështore është Shqipëria e arsimit madhështor, në të cilin mësuesi dhe mësuesja do të jenë në piedestalin e nderit që u takon për misionin e madh që kanë. Nuk ka mision më të rëndësishëm dhe më serioz se ai i mësuesit,” deklaroi Berisha.

Ai shtoi se Partia Demokratike synon t’i rikthejë arsimit vendin e merituar në shoqëri dhe të sigurojë një trajtim dinjitoz për të gjithë mësuesit në Shqipëri.

“Nuk mund të ketë mësues me rrogë mesatare në Shqipëri,” përfundoi Berisha, duke premtuar politika konkrete për përmirësimin e kushteve të punës dhe rritjen e investimeve në arsim.