Partia Socialiste mbyll këtë mbrëmje fushatën elektorale të 25 prillit. Mitingu i fundit elektoral mbahet në qytetin e Vlorës.

Në nisje të takimit, kryeministri Edi Rama është shfaqur mes turmës së njerëzve, i shoqëruar nga djali i tij i vogël, Zaho.

Mitingu është hapur nga drejtuesi politik i PS në Vlorë, Damian Gjiknuri, i cili tha se vlonjatët duhet të votojnë socialistët për Vlorën turistike.

Nga qyteti i Vlorës, në fushatën përmbyllëse të PS për zgjedhjet e 25 prillit, kryeministri Edi Rama iu bëri thirrje vlonjatëve t’i japin nëntë mandate, duke premtuar se do ta bëjë qytetin bregdetar 12 herë më të bukur, nga ç’është tani.

Në mitingun përmbyllës që zhvilloi në qytetin e Vlorës, kryeministri Edi Rama, tregoi arsyet se përse vlonjatët dhe e gjithë Shqipëria duhet ë vazhdojë përpara me Partinë Socialiste.

Sipas kryeministrit, Vlorës i kthyen kurrizin për vite me radhë si të majtët, si të djathtët, ndaj dhe ai kërkoi 9 mandate për të vijuar, sipas tij, transformimin e këtij qyteti, që i jep kuptim Shqipërisë.

“T’i japim fund me Saliun, Lulin, Monikën, e çdo paçavure që 30 vite na janë qepur mbrapa si fantazma të së shkuarës. A ju kujtohet si e lanë Vlorën edhe të majtët, edhe të djathtët. Të majtët thonin ‘ata i kemi në xhep’, të djathtët thonin ‘ata me ne nuk bëhen kurrë’ dhe të dyja palët ja kishin kthyer kurrizin këtij vendi, që i jep kuptim shqiptarisë. Nëse më 25 prill, më jepni mua dhe PS 9 mandate, ju them se në katër vitet e ardhshme do të bëj 12 herë më shumë për Vlorën, se ç’kemi bërë në këto dy mandate. Vlora e pas 4 viteve do jetë 12 herë më e mirë se kjo që është sot. Kur them Vlora, unë them Shqipëria”, tha Rama.