Ata vuajtën bashkë dhe u rritën në kampet e Sirisë. Sot, motër e vëlla janë sërish pranë njëri-tjetrit në Shqipëri, duke mbyllur një kapitull të gjatë dhimbjeje.

Momenti më prekës ishte rikthimi i Evës në shtëpi dhe takimi i saj me të ëmën, Mide Dumani, pas 12 vitesh ndarje. Lotët e gëzimit dhe përqafimi i gjatë mes nënës dhe vajzës shënuan fundin e një pritjeje të mundimshme.

Pak çaste më vonë, Eva u takua edhe me vëllanë e saj, Endrin, i cili ishte kthyer nga Siria gjashtë vite më parë. Ribashkimi i tyre simbolizoi rikthimin e familjes pas një periudhe të errët dhe të vështirë.

Historia e familjes Dumani është një dramë 12-vjeçare. Sipas rrëfimeve publike, bashkëshorti i Mide Dumanit, Shkëlzeni, mori fëmijët dhe i çoi në Siri, duke e lënë nënën në një betejë të gjatë për t’i rikthyer.

Sot, pas shumë vitesh ankthi dhe pritjeje, familja është sërish bashkë – një histori dhimbjeje, por edhe shprese dhe qëndrese.