Turqia ka vendosur të hetojë këdo që dyshohet se është përgjegjës për shembjen e ndërtesave në tërmetet shkatërruese gati një javë më parë dhe ka urdhëruar tashmë ndalimin e 113 të dyshuarve.

Zëvendëspresidenti Fuat Oktay tha se 131 të dyshuar janë identifikuar deri më tani si përgjegjës për shembjen e disa prej mijëra ndërtesave të rrafshuara në 10 provincat e prekura nga lëkundjet e së hënës së kaluar.

“Për 113 prej tyre janë lëshuar urdhra ndalimi,” u tha Oktay gazetarëve në një konferencë në qendrën e koordinimit të menaxhimit të fatkeqësive në Ankara.

“Ne do ta ndjekim këtë me përpikmëri deri në përfundimin e procesit të nevojshëm gjyqësor, veçanërisht për ndërtesat që kanë pësuar dëmtime të mëdha dhe objektet që kanë shkaktuar vdekje dhe lëndime”.

Ai tha se ministria e Drejtësisë kishte krijuar zyra hetimore për krimet e tërmetit në provincat e zonës së tërmetit për të hetuar vdekjet dhe lëndimet.

Ministri i Mjedisit Murat Kurum tha se 24,921 ndërtesa në të gjithë rajonin janë shembur ose janë dëmtuar rëndë nga tërmeti, bazuar në vlerësimet e më shumë se 170,000 ndërtesave.