Një pasdite e qetë festash është shndërruar në një skenë paniku në kryeqytetin francez, pasi tre gra janë sulmuar me thikë brenda pak minutash në linjën 3 të metrosë së Parisit. Autori i sulmeve ka arritur të largohet nga vendngjarja dhe aktualisht ndodhet në arrati.

Ngjarja e rëndë është konfirmuar nga kompania publike që menaxhon transportin urban të Parisit, RATP. Sipas njoftimit zyrtar, incidentet kanë ndodhur në një hark kohor prej rreth 30 minutash, nga ora 16:15 deri në 16:45, në një prej zonave më të frekuentuara dhe më të populluara të qytetit.

Agresori, i armatosur me një thikë, ka sulmuar viktimat në tre stacione të ndryshme qendrore të linjës 3: Arts et Métiers, République dhe Opéra. Sulmet e njëpasnjëshme kanë shkaktuar frikë dhe kaos mes udhëtarëve, ndërsa shërbimet e emergjencës janë mobilizuar menjëherë për t’u ardhur në ndihmë të plagosurve.

Policia franceze ka nisur një operacion të gjerë kërkimi për identifikimin dhe arrestimin e autorit, i cili dyshohet se ka përfituar nga fluksi i madh i njerëzve për t’u larguar pa u vënë re. Deri më tani, autoritetet nuk kanë dhënë detaje mbi gjendjen shëndetësore të viktimave.

Motivet e sulmit mbeten ende të paqarta, ndërsa autoritetet kanë rritur masat e sigurisë në të gjithë rrjetin e transportit nëntokësor të Parisit, duke forcuar praninë policore në stacione dhe trena. Hetimet vijojnë për të zbardhur rrethanat e plota të kësaj ngjarjeje që ka tronditur qytetin në prag festash.