Deputeti i Lëvizjes Bashkë, Redi Muçi, hodhi akuza të forta ndaj të dy palëve politike gjatë një replikë në Kuvend, duke i quajtur përpjekjet e tyre për të treguar dashurinë ndaj Kosovës si “patriotizëm fals”.

Muçi kritikoi debatet që kanë zgjatur mbi çështjen e njohjes së gjenocidit serb në Kosovë, duke ironizuar se për dy orë në seancë të dyja palët “i kanë rrahur gjokset se kush e do më shumë Kosovën”, duke i krahasuar veprimet e tyre ndaj udhëheqësve serbë, Aleksandër Vuçiç dhe Slobodan Milosheviç.

Ai propozoi një zgjidhje të thjeshtë: “Njëra palë le të pranojë gjenocidin në Kosovë dhe gjithë së bashku le të shkojmë në tubimin për krerët e UÇK-së. Nuk ka pse të vazhdojë kjo farsë këtu e dy orë.”

Muçi shtoi gjithashtu se, sa i përket patriotizmit dhe dashurisë për atdheun, të dyja palët e kanë dëshmuar, por sipas tij, vetëm për të “keqqeverisur shqiptarët dhe për të vjedhur fondet publike.”

Deklarata e tij vjen në një moment të tensionuar në Kuvend, ku çështjet e historisë dhe gjeopolitikës së Kosovës kanë qenë shpesh burim për debate të ashpra mes mazhorancës dhe opozitës.