Megjithëse Gjykata Kushtetuese ka pezulluar dekretin për zhvillimin e zgjedhjeve të pjesshme në Bashkinë e Tiranës dhe Komisioni Qendror i Zgjedhjeve ka ndërprerë përgatitjet për procesin e 9 nëntorit, kandidatja socialiste Ogerta Manastirliu vijon takimet me qytetarët.

Sot, ajo zhvilloi një takim me banorët e njësisë nr. 2, ku foli për projektet që synojnë çlirimin e hapësirave publike, përmirësimin e transportit urban dhe zhvillimin e konceptit të ri të “super blloqeve” brenda lagjeve të kryeqytetit.

“Kemi çliruar mbi 1500 pika në qytet, por kjo nuk është një nismë kundër dikujt, është në të mirën e përbashkët. Duam të krijojmë më shumë hapësira për fëmijët, për të moshuarit, për komunitetin në tërësi — për një qytet më të jetueshëm,” deklaroi Manastirliu.

Duke iu përgjigjur shqetësimeve të banorëve për trafikun dhe transportin publik, ajo theksoi nevojën për investime të reja në këtë sektor:

“Ka shumë për të bërë për transportin publik që të lehtësojmë trafikun e përditshëm. Koncepti i ri urban do të krijojë më shumë gjelbërim, hapësira për këmbësorët dhe lojëra për fëmijët.”

Në mbyllje të takimit, kandidatja e PS për Bashkinë e Tiranës u shpreh se “Tiranës i duhet një ekip që punon me zemër dhe e zhvillon qytetin me ritmin që po ecën Shqipëria.”