Drejtuesi i Departamentit të Drejtësisë në PD, Franc Nuri, ka reaguar ndaj kërkesës së Presidentit Bajram Begaj për “Deklarimin e mbarimit të mandatit të Gjyqtarit të Gjykatës Kushtetuese”, duke e akuzuar atë për mbështetje të mazhorancës në një tentativë për të marrë kontrollin total mbi Gjykatën Kushtetuese.

Në një deklaratë për mediat, Nuri ka theksuar se ky veprim i Presidentit nuk është një hap i rastësishëm, por një përpjekje e qartë për të ndihmuar mazhorancën që të kontrollojë Gjykatën Kushtetuese tre muaj para zgjedhjeve të përgjithshme të 11 Majit.

“Duke kërkuar interpretim për kohëzgjatjen e mandatit të gjyqtares Sonila Bejtja, një nga ato që ka kundërshtuar vendimet e padrejta të Qeverisë, Begaj ka treguar hapur qëllimin e vërtetë: të riaktivizojë tentativat e mazhorancës për të kapur Gjykatën Kushtetuese,” tha Nuri.

Ai i bëri thirrje qytetarëve shqiptarë që besojnë te liria dhe ndarja e pushtetit të bashkohen në protestën kombëtare të 8 Shkurtit për të kundërshtuar këtë zhvillim dhe për të mbrojtur pavarësinë e institucioneve të drejtësisë.

Nuri gjithashtu kritikoi presidentin për mungesën e veprimeve ndaj ligjeve që janë shpallur antikushtetuese dhe për mbështetje ndaj veprimeve të qeverisë që kanë shkelur interesat kombëtare.