Partia Demokratike ka dërguar në Gjykatën Kushtetuese kërkesën për shqyrtimin e mandatit të deputetit socialist Vullnet Sinaj, pas një muaji që mazhoranca e rrëzoi kërkesën e PD-së me shumicë votash në Kuvend. Kërkesa e demokratëve vjen në përputhje me opinionin e Komisionit të Venecias, i cili theksoi se deputetët mund të nisin një kërkesë për në Gjykatën Kushtetuese nëse kanë firmat e të paktën 1/5 të deputetëve.

Me firmën e 14 ligjvënësve, demokratët kërkojnë që të shqyrtohet nëse Sinaj duhet të mbajë apo jo postin e deputetit, pasi akuzohet për përfitime të paligjshme nga bizneset e tij, duke marrë para nga buxheti i shtetit. Sipas dokumentit, Sinaj ka përfituar një shumë prej 3 milionë lekësh gjatë periudhës 2017-2024.

Ky veprim vjen pas dështimit të kërkesës së PD-së në Kuvend, kur mazhoranca me 73 vota kundër refuzoi dërgimin e çështjes në Gjykatën Kushtetuese.