Partia Demokratike i është drejtuar zyrtarisht Komisionit Qendror të Zgjedhjeve (KQZ) me një kërkesë për informim dhe dokumentacion të plotë, lidhur me problematikat e konstatuara në shpërndarjen e zarfeve të votimit për diasporën në të 12 qarqet e vendit.

Në shkresën zyrtare të firmosur nga përfaqësuesi ligjor i PD-së, Franc Nuri, theksohet se janë raportuar një sërë shkeljesh të standardeve dhe protokolleve publike të KQZ-së, veçanërisht në lidhje me përdorimin e postës private për dërgimin e materialeve zgjedhore.

Çfarë kërkon konkretisht PD?
Partia Demokratike i kërkon KQZ-së që:
• Të vërë në dispozicion të gjitha procesverbalet mbi problematikat e evidentuara me zarfet për votuesit e diasporës;
• Të bëjë transparencë për të gjitha komunikimet mes KQZ-së, kompanisë DHL dhe kompanive të prodhimit të zarfeve (përfshirë nënkontraktorët e tyre);
• Të sigurojë një përditësim të vazhdueshëm të informacionit, duke respektuar interesin publik dhe transparencën institucionale.