Partia Demokratike ka njoftuar se të mërkurën, më 12 mars, do të mbledhë Kryesinë dhe Këshillin Kombëtar për të finalizuar listat e kandidatëve për deputetë në zgjedhjet e 11 majit. Mbledhja e Kryesisë do të zhvillohet në orën 17:00, ndërsa Këshilli Kombëtar do të mblidhet në orën 19:00.

Kjo mbledhje vjen në ditën e fundit të afatit zyrtar për dorëzimin e listave në Komisionin Qendror të Zgjedhjeve (KQZ). Pas arritjes së marrëveshjeve mes PD-së dhe 25 partive aleate, pritet që të finalizohen emrat që do të garojnë nën siglën e “Aleancës për Shqipërinë Madhështore”.

Një nga aleatët kryesorë të PD-së, Partia Agrare Ambientaliste e Agron Dukës, ka konfirmuar se ai vetë nuk do të jetë në listë, por partia e tij do të ketë përfaqësues.

Ndërkohë, pakti mes Sali Berishës dhe Ilir Metës ka garantuar disa pozicione të sigurta për kandidatët e Partisë së Lirisë. Ilir Meta do të jetë kandidat në Tiranë në listën e hapur të PD-së, ndërsa një vend i sigurt pritet t’i jepet edhe Tedi Blushit.

Në Qarkun e Elbasanit, një tjetër vend i sigurt i është garantuar Partisë së Lirisë, ku emri më i përfolur është ai i ish-ministrit Edmond Haxhinasto.

Gjithashtu, në Qarkun e Fierit, Partia e Lirisë do të ketë një mandat të sigurt, ku emri i pranuar nga PD-ja është ai i Erisa Xhixhos.

Me këtë konfigurim, koalicioni opozitar synon të garojë me një listë të konsoliduar dhe të maksimizojë mbështetjen elektorale në zgjedhjet e ardhshme.