Deputetët demokratë kanë reaguar ashpër ndaj vendimit të qeverisë për mbylljen e rrjetit social TikTok, duke e cilësuar atë si një akt censure që vjen pak ditë para nisjes së fushatës elektorale.

Flamur Noka u shpreh se ky veprim tregon se kryeministri Edi Rama është armik i fjalës së lirë.

“Rama po bën censurë. Çfarëdo që të bëjë, do të mbetet në histori si armiku i fjalës së lirë dhe armiku i shqiptarëve,” tha Noka.

Ndërkohë, deputeti Luçiano Boçi kritikoi faktin që qeveria po e mbyll platformën në vend që të vendosë filtra për përmbajtjet e dëmshme.

“Pse po e mbyll para fushatës? Rama kërkon të ‘edukojë’ TikTok? Pse nuk ndodh si në vendet e tjera ku aplikohen filtra në platformë kundër dhunës?” deklaroi Boçi.

Vendimi për mbylljen e TikTok ka ngjallur debate të forta politike, ndërsa opozita e sheh si një përpjekje për të kufizuar lirinë e shprehjes në prag të zgjedhjeve.