Komisioni Shtetëror i Zgjedhjeve iu është drejtuar me një kërkesë për marrje masash dy partive më të mëdha në vend, Partisë Socialiste dhe Partisë Demokratike. Sipas KQZ, të dyja këto parti nuk kanë zbatuar rregullat e vendosura për fushatën elektorale të zgjedhjeve të 25 prillit.

Komisioni Qendror i Zgjedhjeve kërkon prej tyre marrjen e masave për heqjen e posterave elektoralë nga ndërtesa publike.

Në letrën drejtuar Partisë Demokratike, KQZ kërkon që kjo parti të ndalojë menjëherë materialet propagandistike të koalicionit “Partia Demokratike – Aleanca për Ndryshim PD-An”, nga fasadat e godinës Universitetit Politeknik të Tiranës. Sipas KQZ kjo ndalohet nga Kodi Zgjedhor ku në pikën 3 të nenit 3, ndalohet në mënyrë taksative afishimi i materialeve propagandistike në fasadat e godinave të banimit, institucioneve publike apo rreth tyre, brenda zonave rekreative, parqeve, në pemët e qytetit apo në shtyllat e ndriçimit.

Ndërkohë, KQZ i drejtohet me letër edhe PS-së, ku shprehet se partitë politike duhet të zhvillojnë një fushatë zgjedhore të qetë, duke shmangur politikat e polarizimit dhe retorikat denigruese ndaj kundërshtarëve, e duke treguar vetëpërmbajtje gjatë dhënies së mesazheve politike, edhe nëpërmjet materialeve propagandistike.