Partia Demokratike ka vazhduar të ngrejë akuza ndaj zëvendëskryeministres dhe ministres së Energjetikës, Belinda Balluku, duke e akuzuar për përfshirje në një skemë të dyshuar korruptive lidhur me tregtinë e energjisë elektrike. Sipas dokumenteve të publikuara së fundmi nga PD, Balluku akuzohet se ka lejuar shitjen e energjisë elektrike me çmime më të ulëta dhe blerjen e saj me çmime më të larta jashtë bursës së energjisë, duke krijuar kështu favorizime për kompani private në mënyrë të paligjshme dhe duke sjellë një dëm të vlerësuar prej rreth 180 milionë euro për buxhetin e shtetit.

Kreu i grupit parlamentar të PD-së, Gazment Bardhi, ka publikuar dokumente që mbështesin padinë e tyre të dorëzuar në SPAK. Në këto dokumente argumentohet se Korporata Elektroenergjetike Shqiptare (KESH), gjatë datave 20-23 qershor, ka shitur 24,000 megavat energji elektrike me një çmim prej 85.6 lekë për megavat, ndërsa çmimi në bursën ALPEX të Shqipërisë ishte 112.6 lekë për megavat. Bardhi thekson se kjo shitje me çmim më të ulët ka shkaktuar buxhetit të shtetit një humbje prej 648 mijë euro vetëm për këto tre ditë specifike.

Këto akuza për menaxhim të keq të situatës për blerjen e energjisë dhe favorizimin e paligjshëm të kompanive private kanë shtuar tensionet mes Partisë Demokratike dhe qeverisë, ndërkohë që PD vazhdon të kërkojë transparencë dhe përgjegjësi për menaxhimin e fondeve publike.

Dokumentet zyrtare tregojnë se me firmë dhe me vule Belinda Balluku ka vendosur që volumet e blera në tregun vendas të energjisë do të prokurohen EKSKLUZIVISHT nëpermjet tregut (ALPEX) në përputhje me përcaktimet e ligjit nr. 43/2015 të sektorit të energjisë elektrike, pavarësisht origjinës së energjisë në fjalë, duke filluar nga viti 2023.

Ky është një krim shtetëror! Kjo është një aferë monstruoze që i bëhet një populli të varfër, që e paguan shtrenjtë energjinë elektrike, vetëm se Belinda Balluku dhe një grusht kompanish të përzgjedhur prej saj, kanë vendosur të pasurohen në kundërshtim me ligjin.