Një 46-vjeçar u arrestua nga Policia e Peqinit pasi u kap në flagrancë duke tentuar të vidhte për herë të dytë në të njëjtën banesë në lagjen “Xhami”.

Gjatë kontrollit, autoritetet i gjetën mjetin që përdorte për vjedhje (darë), ndërsa në banesën e tij u sekuestruan një armë gjahu dhe sende të tjera të vjedhura.

Sipas njoftimit të policisë:

“Shërbimet e Komisariatit të Policisë Peqin, pas marrjes së informacionit për një vjedhje në lagjen ‘Xhami’, organizuan menjëherë punën dhe kapën në flagrancë shtetasin A. R., 46 vjeç, banues në lagjen ‘Xhami’, i dënuar më parë për vjedhje, në banesën ku kishte hyrë për të vjedhur. Nga hetimet dyshohet se i njëjti ka vjedhur më parë një armë gjahu dhe disa sende në të njëjtën banesë.”

Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme.