Policia e Peqinit, në bashkëpunim me Forcën e Posaçme Operacionale të DVP Elbasan, ka finalizuar operacionin policor të koduar “Syri i natës”, duke goditur një rrjet kriminal të kultivimit të bimëve narkotike dhe të armëmbajtjes pa leje.

Si rezultat i operacionit, janë arrestuar në flagrancë 5 shtetas, të cilët janë:
• Qemal Kaseja, 67 vjeç,
• Qazim Kaseja, 24 vjeç (babë e bir, banues në fshatin Karinë),
• Erges Juba, 37 vjeç, banues në Peqin,
• Altin Haskasa, 31 vjeç,
• Ali Haskasa, 59 vjeç (babë e bir, banues në fshatin Garunjë e Vogël).

Gjithashtu, nisi procedimi penal për shtetasin E. K., 32 vjeç, dhe u shpall në kërkim shtetasi A. J.

Gjatë operacionit u asgjësuan 112 bimë narkotike të kultivuara në vendin e quajtur “Zabeli i Akaciave” në fshatin Karinë, ndërsa nga kontrolli i banesave janë sekuestruar:
• 1 armë zjarri kallashnikov,
• 2 pistoleta me municion luftarak,
• 1 armë gjuetie,
• kapsolla detonatore me fitil zjarrpërcjellës,
• thika dhe targa automjeti.

Operacioni vijon për dokumentimin e plotë të veprimtarisë kriminale, kapjen e shtetasve në kërkim dhe identifikimin e të tjerëve të përfshirë.

Materialet procedurale janë referuar Prokurorisë së Elbasanit për veprime të mëtejshme për veprat penale:
• Prodhimi dhe shitja e narkotikëve,
• Kultivimi i bimëve narkotike,
• Mbajtja pa leje dhe prodhimi i armëve, armëve shpërthyese dhe municionit,
• Prodhimi dhe mbajtja pa leje e armëve të gjuetisë,
• Prodhimi, mbajtja, blerja apo shitja pa leje e armëve të ftohta.