Instituti i Mjekësisë Ligjore ka publikuar përfundimet për tragjedinë e 2 majit në Shkodër, ku një nënë dhe tre fëmijët e saj humbën jetën. Sipas analizave toksikologjike, është konfirmuar se nëna dhe fëmijët nuk kishin konsumuar asnjë lloj lënde që mund të kishte ndikuar në marrjen e aktit tragjik të mbytjes.

Gazetarja e “Jetë Shqiptare”, Aida Topalli, informoi se Instituti i Mjekësisë Ligjore i ka dërguar Prokurorisë së Shkodrës përgjigjen e analizave toksikologjike për katër viktimat. Nga analizat është konstatuar se nuk kanë konsumuar asnjë lloj lënde që të ketë ndikuar në aktin final. Për më tepër, përgjigjja për dy fëmijët e Alma Arrazit ka treguar se shkaku i vdekjes ishte mbytja dhe nuk është konstatuar asnjë lloj dhune.

Megjithatë, ende pritet përgjigjja për analizat lidhur me shkakun e vdekjes së Alma Arrazit dhe njërin prej fëmijëve të saj. Për këtë tragjedi është arrestuar bashkëshorti i viktimës dhe babai i fëmijëve, Erdgys Arrazi, nën akuzën e ushtrimit të dhunës në familje. Hetimet deri tani tregojnë se Arrazi ka ushtruar dhunë, gjë që mendohet se ka shtyrë 39-vjeçaren drejt aktit të vetëflijimit.

Konfliktet në familje duket se kishin filluar prej kohësh, pasi Alma Arrazi kishte zbuluar tradhtinë e bashkëshortit të saj me një vajzë shumë më të re. Edhe pse 32-vjeçari ka mohuar akuzat, duke treguar se e shoqja vuante nga probleme të shëndetit mendor, familjarët e viktimës pretendojnë se ai kishte një lidhje jashtëmartesore, çka është marrë në konsideratë si pistë hetimi nga autoritetet.