Reshjet intensive të shiut kanë shkaktuar përmbytje në disa zona të Greqisë, kryesisht në ishujt Paros dhe Mykonos. Sipas sipërmarrësit të ndërtimit Elpon Imerja, i cili jeton në Greqi, shirat e rrëmbyeshëm dhe breshëri kanë shkaktuar probleme në shumë banesa, por fatmirësisht nuk ka pasur rrezik për jetën e njerëzve.

“Reshjet e djeshme zgjatën rreth dy orë dhe për shkak të ndërhyrjeve në rrugë, u krijuan përmbytje. Në shumë shtëpi u fut uji, duke shkaktuar dëme, por fatmirësisht nuk pati viktima. Rrugicat e Mykonos janë të ngushta dhe nuk kanë hapësira të mjaftueshme për të larguar ujin me shpejtësi”, tha ai.

Autoritetet greke kishin paralajmëruar për reshje të dendura, duke këshilluar banorët të shmangin lëvizjet e panevojshme. Ndërkohë, sipërmarrësi shqiptar shtoi se nuk ka pësuar dëme në bizneset e tij, por disa bashkatdhetarë të tij janë prekur nga përmbytjet.