Shirat e dendur kanë shkaktuar përmbytje dhe rrëshqitje të dheut në Italinë qendrore dhe veriore, duke detyruar zjarrfikësit italianë të punojnë gjatë natës të enjten për të shpëtuar njerëzit në rajonet e prekura.

Sipas departamentit të zjarrfikësve, rreth 350 operacione për të kufizuar dëmet dhe për të shpëtuar njerëz janë kryer mes të enjtes dhe të premtes në rajonet e Ligurias, Toskanës dhe Emilia Romagnas, sipas agjencisë së lajmeve AP. Në Liguri, një nga rajonet më të prekura, janë kryer 100 ndërhyrje urgjente, kryesisht në zonën e Genoas. Shumica e njerëzve të shpëtuar ishin bllokuar në automjetet e tyre ose në katet e poshtme të shtëpive për shkak të rritjes së nivelit të ujit.

Në provincën e Sienës në Toskanë, u kryen 60 shpëtime të lidhura me motin, ndërsa në provincën Livorno, në rajonin e Liguria, 30 persona u shpëtuan gjatë natës kur lumi Cornia doli nga shtrati. Mbrojtja Civile lëshoi të enjten një nivel alarmi portokalli për ditët në vijim në pesë rajone në Italinë veriore dhe qendrore.