Pas deklaratave të forta të artistit Gjest, i cili u shpreh se po përballet me padrejtësi dhe se për një kohë të pacaktuar nuk do të publikojë projekte të reja për shkak të problemeve me distributorin e tij të mëparshëm, ka ardhur sot reagimi zyrtar nga pala tjetër e përfshirë në këtë çështje.

Erkand Shabani, drejtues i platformës muzikore “Onima”, e ka cilësuar publikimin e artistit si “lajme të rreme” dhe ka shprehur “keqardhje të thellë” për, sipas tij, keqinformimin që po i bëhet publikut.

Në reagimin e Shabanit sqarohet se konflikti buron nga kërkesa e Gjestit për t’u liruar nga kontrata për shpërndarjen dhe monetizimin e projekteve të tij muzikore – një marrëveshje që, sipas Onimës, është nënshkruar me vullnet të lirë dhe mbetet plotësisht ligjërisht e vlefshme.

“Kërkesa për shkëputje të kontratës nuk gjen mbështetje ligjore dhe mbetet një interpretim personal i Gjestit dhe stafit të tij, i cili bie ndesh me përmbajtjen e marrëveshjes ekzistuese”, thuhet në reagimin e Onimës.

Ky zhvillim i fundit pritet të thellojë përplasjen mes palëve, ndërkohë që fansat e Gjestit kanë shprehur shqetësim për mungesën e projekteve të reja. Çështja pritet të kalojë në terren ligjor nëse nuk arrihet një kompromis mes artistit dhe kompanisë që aktualisht zotëron të drejtat e shpërndarjes së këngëve të tij.