Me avionë luftarakë që fluturonin mbi bazën ajrore, një qilim të kuq të shtruar deri te dera e avionit presidencial rus dhe një sfond të madh me sloganin shpresëdhënës “Në kërkim të Paqes”, presidenti amerikan Donald Trump mirëpriti homologun e tij rus Vladimir Putin në Anchorage të Alaskës. Samiti, i paralajmëruar si historik, përfundoi papritur dhe pa një rezultat të qartë.

Pas gati tre orësh bisedime, dy liderët dolën përpara kamerave për të shpallur “përparim”, por u larguan nga konferenca e planifikuar pa dhënë detaje konkrete mbi çfarë ishte arritur. Ajo që u bë e qartë ishte fakti se asnjë marrëveshje nuk u firmos, ndërsa armëpushimi që Trump kishte paralajmëruar mbeti i largët.

“Kishte shumë, shumë pika për të cilat ramë dakord – shumicën e tyre, do të thoja. Disa pika të rëndësishme mbeten ende të pazgjidhura, por kemi bërë përparime,” tha Trump, duke shtuar me kujdes: “Nuk ka marrëveshje derisa të ketë një të tillë.”

Putini nuk komentoi gjatë, ndërsa të dy udhëheqësit u larguan pa iu përgjigjur pyetjeve të gazetarëve, duke i lënë të hapura dyshimet mbi rezultatet e samitit.

Megjithatë, pavarësisht ceremonialit, atmosfera e bisedimeve u zbeh nga realiteti i terrenit. Pikërisht në momentin kur dy presidentët shtrëngonin duart në pistën e bazës Elmendorf, në Ukrainë ranë alarme për sulme ajrore nga dronë dhe avionë rusë, një shenjë se Moska nuk kishte ndërmend të ndalte operacionet ushtarake edhe gjatë negociatave.

Samiti i Alaskës, i zhvilluar pa praninë e presidentit ukrainas Volodymyr Zelensky, u pa nga shumë analistë si një moment rikthimi diplomatik për Putinin, por pa garanci të prekshme për paqen. Për momentin, paqartësia mbetet fjala kyçe — një takim me shumë simbolikë, por pak rezultate konkrete.