TIRANË – Seanca plenare e parë pas zgjedhjeve të 11 majit përfundoi pas vetëm 15 minutash, duke u shoqëruar me përplasje të forta mes opozitës dhe maxhorancës. Seanca u hap me fjalën e ish-kryeministrit Sali Berisha, i cili akuzoi qeverinë për manipulim të rezultatit zgjedhor përmes ndikimit të karteleve të drogës dhe parave të krimit të organizuar.

“Zgjedhjet e 11 majit ishin një farsë, një maskaradë elektorale e kontrolluar nga kartelet dhe Edi Rama,” deklaroi Berisha në sallën e Kuvendit.

Fjala e kreut të PD-së u ndërpre nga kryetarja e Kuvendit, Elisa Spiropali, pasi përfundoi minutazhi i lejuar. Ndërhyrja e Spiropalit ndezi përplasjen:

Spiropali: “Koha juaj ka përfunduar, ka perënduar.”
Berisha: “Cila kohë?”

Tonet e larta dhe shkëmbimi i replikave të ashpra bënë që seanca të mbyllet në mënyrë të papritur, duke reflektuar përçarjen politike që vijon të thellohet edhe pas procesit zgjedhor.