Në prag të nisjes së fushatës elektorale për zgjedhjet vendore në Tiranë, përplasja mes Partisë Socialiste dhe Partisë Demokratike është zhvendosur edhe një herë në rrjetet sociale.
Një postim ironik i kryeministrit Edi Rama në Facebook ka mjaftuar për të ndezur debatet politike mes dy kampeve kryesore.

Rama publikoi një foto nga Dega 1 e PD-së në Tiranë, ku në xhamin e selisë shfaqet një njoftim me mbishkrimin “Shitet dyqani”, duke ironizuar kështu situatën e brendshme të demokratëve, të cilët prej ditësh po diskutojnë për një figurë konsensuale që do të përfaqësojë opozitën në garën për kryeqytetin.

Reagimi nga ana e PD-së nuk vonoi.
Kryetari i grupit parlamentar, Gazment Bardhi, iu kundërpërgjigj me një foto të selisë së PS-së, ku në xham shihet një njoftim tjetër: “Jepet me qira”, mbi të cilin ndodhet edhe posteri i Erion Veliajt, ndërsa dera e zyrës është e mbyllur me hekur, duke krijuar pamjen e “Veliajt pas grilave”.

Në përshkrimin e postimit të tij, Bardhi shkroi shkurt dhe prerë:

“Përgjigje për kryeministrin karagjoz të Shqipërisë.”

Kjo shkëmbim ironish vizuale mes dy forcave politike po komentohet gjerësisht në rrjet, ndërkohë që fushata për Tiranën pritet të jetë ndër më të ashpra të viteve të fundit.

Analistët politikë shprehen se “beteja e kryeqytetit” ka hyrë në fazën e simbolikave dhe thumbimeve, përpara se të zbardhen emrat e kandidatëve zyrtarë që do të garojnë për Bashkinë e Tiranës.