Në protestën e zhvilluar nga Partia Demokratike në Tiranë, nuk munguan përplasjet me Policinë e Shtetit dhe aktet e dhunshme. Gjatë tubimit u përdorën mjete shpërthyese artizanale, ndërsa autoritetet kanë nisur hetimet për të identifikuar personat përgjegjës dhe origjinën e tyre.

Eksperti i kriminalistikës, Ervin Karamuço, deklaroi se policia po heton për të zbuluar se kush i ka sjellë bombat artizanale dhe nga kanë ardhur ato. “Është një fabrikë në Kosovë që i prodhon, me disa filiale. Ka pasur edhe në Shqipëri, por nuk ekziston më. Përdoren për fishekzjarrë, por janë gjashtë herë më të fuqishme se ato që përdorin fëmijët për festa, të ashtuquajturat ‘shashka’. Policia po komunikon me autoritetet në Kosovë për të kuptuar se si vijnë dhe shpërndahen. Aty ka gjurmë gishtash. Edhe manipulimi dhe përgatitja e tyre përbën vepër penale, jo më përdorimi,” tha Karamuço.

Autoritetet po vijojnë hetimet për dokumentimin e ngjarjes dhe identifikimin e të gjithë personave të përfshirë në incidentet e dhunshme, ndërsa situata mbetet e tensionuar pas tubimit.