Dy vjet pas vdekjes së nipit të aktorit të njohur hollivudian, Robert De Niro, Leandro Anthony De Niro-Rodriguez, autoritetet amerikane kanë bërë pesë arrestime të reja.

Leandro, 19 vjeç, djali i vajzës së adoptuar të De Niro-s, Drena, u gjet i vdekur më 2 korrik 2023, si pasojë e një mbidoze droge.

Pesë të arrestuarit – Grant McIver, Bruce Epperson, Eddie Barretto, John Nicholas dhe Roy Nicholas – akuzohen nga prokurorët si pjesëtarë të një rrjeti kriminal që shpërndante pilula opioide të përziera me fentanil, të destinuara tek adoleshentët dhe të rinjtë në New York City. Sipas aktakuzës, këto pilula shkaktuan vdekjen e tre 19-vjeçarëve, përfshirë edhe Leandron, raporton TMZ.

Një tjetër person, një grua me emrin Sofia Marks, u arrestua disa javë pas ngjarjes, me akuzën e shitjes së drogës tek i riu.

Raportohet se Leandro ishte parë për herë të fundit nga një mik i tij, i cili pas disa ditësh pa asnjë kontakt, shkoi ta kontrollonte, duke zbuluar tragjedinë.

Kjo çështje ka rikthyer vëmendjen tek përhapja e rrezikshme e fentanilit mes të rinjve në qytetet amerikane dhe përgjegjësia e rrjeteve kriminale që e shpërndajnë.