Një ngjarje e rëndë është regjistruar paraditen e sotme në qytetin e Peshkopisë, ku një sherr për motive të dobëta ka përfunduar me plagosjen e një të riu. Ngjarja ndodhi rreth orës 11:00 në bulevardin kryesor të qytetit, duke shkaktuar panik tek qytetarët që ndodheshin aty pranë.

Sipas informacioneve zyrtare të policisë, I.G., 24 vjeç, banues në fshatin Brezhdan, dyshohet se ka plagosur me thikë Xh.D., 23 vjeç, banues në fshatin Ushtelenxë.

I plagosuri është transportuar menjëherë në spitalin rajonal, ku po merr ndihmën e nevojshme mjekësore. Mësohet se ai është jashtë rrezikut për jetën.

Autori i dyshuar është shpallur në kërkim, ndërsa forcat policore po punojnë për kapjen e tij.

Policia e Dibrës njofton:

“Rreth orës 11:00, në bulevardin e qytetit të Peshkopisë, gjatë një konflikti për motive të dobëta, shtetasi I.G., 24 vjeç, dyshohet se ka plagosur me mjet prerës (thikë), shtetasin Xh.D., 23 vjeç, i cili po merr ndihmë mjekësore në spital. Autori është shpallur në kërkim dhe vijon puna për kapjen e tij.”

Ndërkohë, grupi hetimor, nën drejtimin e Prokurorisë, ka nisur punën për zbardhjen e plotë të rrethanave të ngjarjes, përfshirë motivet dhe mjetet e përdorura.

Ngjarja ka shkaktuar reagime të forta në opinionin lokal, për shkak të faktit se ndodhi në mes të ditës dhe në një nga zonat më të frekuentuara të qytetit.