Lëvizja e parë e drejtuesit të komanduar të Policia e Shtetit, Sokol Bizhga, duket se ka dhënë menjëherë sinjalin e një ndryshimi në strukturat e brendshme të institucionit.

Bizhga ka firmosur urdhrin për pezullimin nga detyra të Ulian Shpataraku, një prej emrave të konsideruar të afërt me ish-drejtorin e përgjithshëm të policisë, Ilir Proda.

Sipas raportimeve në media, argumenti zyrtar për këtë vendim është “mosparaqitje në mënyrë të rregullt në detyrë” dhe moszbatim i dispozitave ligjore gjatë përmbushjes së detyrave funksionale. Megjithatë, fakti që bëhet fjalë për një zyrtar të konsideruar pjesë e rrethit të ngushtë të ish-drejtuesit të policisë ka shtuar interpretimet për një riformatim të brendshëm dhe distancim nga struktura e mëparshme drejtuese.

Shpataraku ushtronte funksionin e asistentit në Departamentin për Teknologjinë e Informacionit në Policia e Shtetit dhe ishte pjesë e kabinetit të Prodës. Gjatë kohës në këtë detyrë, ai kishte përfituar disa grada që justifikoheshin me “merita të veçanta”.

Burime bëjnë me dije se Shpataraku është aktualisht duke ndjekur studimet master në Akademia e Sigurisë, por dyshohet se, me argumentin e vijimit të studimeve, nuk paraqitej rregullisht në punë.

Për këtë çështje, më herët ka ekzistuar edhe një urdhër i qartë nga drejtori i përgjithshëm që studimet master të ndiqen jashtë orarit zyrtar të punës, çka sipas Policisë përbën shkelje në rast të mosrespektimit.