Një grup kriminal shqiptar që trafikonte drogë nga Gjermania në Itali është shkatërruar nga një operacion ndërkombëtar anti-drogë, i shtrirë edhe në Shqipëri. Operacioni “Sammogia” ka rezultuar në arrestimin e 13 personave, ku 3 prej tyre janë kapur nga Forcat Operacionale në qytetin e Vlorës. Të tre personat rezultojnë të kenë qenë pjesë e grupit kriminal që trafikonte kanabis e kokainë drejt Italisë.

Në kuadër të operacionit “Sammogia”, të inicuar nga policia italiane, janë sekuestruar 26.5 kg kokainë dhe 11 kg kanabis. Ndërkohë, 22 persona janë në hetim, ndërsa arrestimet përveç Vlorës janë kryer edhe në Itali dhe Gjermani.

Në pranga në Vlorë janë rënë dy vëllezërit Ledian dhe Florjan Muho, 33 dhe 38 vjeç, si edhe 52-vjeçari Landi Kalemaj. Gjykata e Bolonjas ka caktuar masën e sigurisë “Arrest në burg” për të tre, për veprën penale “Trafikimi i lëndëve narkotike”, kryer në kuadër të organizatës kriminale.

“Pjesëtarë të një organizate kriminale në Itali, për trafikim narkotikësh, lokalizohen në Vlorë, kapen dhe vihen në pranga 3 shtetas. Gjatë operacionit ndërkombëtar ‘Sammogia’, në total, në Shqipëri, Itali dhe Gjermani, u arrestuan 13 shtetas”, njoftoi Policia e Shtetit.

Mediat italiane kanë zbardhur edhe detaje nga operacioni, ku sipas tyre autoritetet kanë monitoruar disa lëvizje korrierësh nga Gjermania në Itali, teksa shpërndanin drogë. Nga hetimet u konstatua se korrierët shqiptarë, për llogari të organizatës kriminale, shpërndanin çdo javë kokainë dhe kanabis në Itali, duke ua dorëzuar blerësve e bashkatdhetarëve të tyre.

Në pamjet e operacionit shihet se droga ishte ndarë në doza, ndërsa një pjatë kokainë ishte futur në mikrovalë. Gjithashtu, janë sekuestruar edhe sasi të konsiderueshme të eurove cash të fshehura në çorape, si edhe celularë.