Komisioni Qendror i Zgjedhjeve në Kosovë ka përditësuar të dhënat për pjesëmarrjen në votime në zgjedhjet lokale të kësaj të diele. Deri në orën 17:00, kanë votuar 655,710 qytetarë, që përbën 32.38% të trupës zgjedhore, sipas raportimit të 2,411 nga 2,571 qendra votimi.

Në këto zgjedhje kanë të drejtë vote mbi 2 milionë shtetas, ndërsa procesi zgjedhor nisi në orën 07:00 dhe do të përfundojë në 19:00.

Kryeministri në detyrë dhe kreu i Lëvizjes Vetëvendosje, Albin Kurti, u ka bërë thirrje qytetarëve që të shfrytëzojnë orët e fundit për të votuar.
“Qytetarë të Republikës, kanë mbetur më pak se dy orë nga e drejta jonë për të vendosur për të ardhmen e komunave. Thirrni familjarët dhe miqtë që të dalim sa më shumë për të votuar,” u shpreh Kurti në një video mesazh në rrjetet sociale.

Nga ana tjetër, Partia Demokratike e Kosovës (PDK) shprehet optimiste për rezultatet.
Sekretarja e Përgjithshme Vlora Çitaku deklaroi se pjesëmarrja është e kënaqshme dhe se “PDK po prin me epërsi të dukshme në shumë komuna”.
Ajo shtoi se komunat që pritet të shkojnë pa balotazh janë kryesisht ato që drejtohen nga PDK.