Sebastian Muçmata, vëllai i drejtorit të Shërbimeve Publike në Bashkinë e Kukësit, Zenel Muçmata, është vetëdorëzuar sot në polici pasi një ditë më parë plagosi me armë zjarri Elvis Halilajn, kushëririn e kryetarit të Bashkisë së Kukësit, Albert Halilaj.

Ngjarja ndodhi tek agjencia e Bicajve, ndërsa 25-vjeçari ka dorëzuar armën e krimit dhe ka dhënë versionin e tij përpara grupit hetimor. Sipas tij, shkak i konfliktit është bërë shkarkimi nga puna i Elvis Halilajt, i cili pretendonte se ishte larguar padrejtësisht nga detyra nga drejtori i Shërbimeve Publike, Zenel Muçmata.

Deklarata e Sebastian Muçmata

Në dëshminë e tij, Muçmata tha se nuk kishte shkuar me qëllim për të vrarë dikë, por kishte vepruar pasi vëllai i të plagosurit, Qerimi Halilaj, kishte drejtuar armën ndaj babait të tij, Izet Muçmata.

“Kam shkuar menjëherë te makina dhe kam marrë një armë tip pistoletë që e kisha në bagazh dhe kam qëlluar në drejtim të rrugës ku ishin dy vëllezërit Qerimi dhe Elvisi Halilaj. Po të kisha qëllim për t’i vrarë, unë e kisha atë mundësi, por nuk kam pasur qëllim vrasjen e asnjë personi. Kam mësuar se sot, te agjencia e Bicajve, shtetasit Qerim dhe Elvis Halilaj kishin rrahur vëllanë tim, Zenelin, i cili kishte ngelur pa ndjenja i shtrirë në tokë,” tha ai.

Akuzat ndaj Sebastian Muçmata

Prokuroria ka ngritur ndaj tij akuzat për:

•Vrasje me dashje e mbetur në tentativë, në bashkëpunim,
•Mbajtje pa leje të armëve dhe municioneve luftarake.

Hetimet po vijojnë për të zbardhur rrethanat e plota të ngjarjes, ndërsa autoritetet kanë nisur marrjen në pyetje të dëshmitarëve dhe sekuestrimin e provave materiale.