Policia ka shpallur në kërkim Qerim Bellon, si autorin kryesor të plagosjes së ndodhur mbrëmjen e djeshme (26 janar) në Orikum, ndërsa një person tjetër, i cili dyshohet se ishte shoferi i mjetit të arratisjes, është gjithashtu në ndjekje nga forcat e rendit.

Burime nga grupi hetimor bëjnë me dije se ngjarja është zbardhur plotësisht dhe po punohet për arrestimin e autorëve. Sipas të dhënave paraprake, shkaku i konfliktit mendohet të ketë qenë një përplasje për motive të dobëta, por hetimet mbeten të hapura.

Sipas raportimeve, 10 plumba pistolete u qëlluan drejt 29-vjeçarit Sildi Velaj, i cili u godit nga 4 plumba dhe u transportua me urgjencë drejt Tiranës për mjekim të specializuar. Në momentin e sulmit, i plagosuri ndodhej brenda një karburanti, duke luajtur letra me disa miq.

Si ndodhi ngjarja?
Sipas dëshmitarëve, autori Qerim Bello ka hyrë në lokal dhe ka qëlluar disa herë në drejtim të viktimës, më pas është larguar me një automjet tip Golf 5, ku e priste personi i dytë i përfshirë në ngjarje.

Gjatë largimit, një person tjetër ka dalë nga lokali, por autorët kanë vijuar të qëllojnë me armë edhe nga makina.

Policia po vijon hetimet për kapjen e autorëve, ndërsa zona është e monitoruar për çdo lëvizje të dyshuar.