Një ngjarje me armë zjarri ka tronditur Vlorën, ku një 37-vjeçar nga Selenica ka mbetur i plagosur në këmbë. Viktima është identifikuar si Skerdi Mehmetaj, i njohur edhe si Skerdi Mehmetaj Piperi, i cili u transportua menjëherë në spitalin e qytetit dhe ndodhet nën kujdesin e mjekëve. Fatmirësisht, ai nuk rrezikon jetën.

Sipas njoftimit të policisë, Mehmetaj ka mbërritur në spital me një plagë të shkaktuar nga armë zjarri, ndërsa ngjarja ka ndodhur në rrethana ende të paqarta. Autori i dyshuar është shpallur në kërkim dhe forcat e rendit po vijojnë operacionin për kapjen e tij.

“Grupi hetimor po punon për sqarimin e rrethanave të ngjarjes dhe dokumentimin e plotë ligjor të saj”, bën të ditur Policia e Vlorës në njoftimin zyrtar.

Ngjarja ka sjellë shqetësim në komunitet, teksa autoritetet po hetojnë për të zbuluar shkaqet e atentatit dhe lidhjet e mundshme mes autorit dhe të plagosurit.