Një shqiptar ka mbetur i plagosur me armë zjarri pas një debati me një bashkëatdhetar. Incidenti ndodhi në orët e para të mëngjesit, rreth orës 04:00, në Via Padova të Milanos. Mediat italiane raportojnë se konflikti mes dy shqiptarëve ka përshkallëzuar deri në përdorimin e armës.

Sipas burimeve, një 32-vjeçar nxori armën gjatë debatit, por në përpjekje për të parandaluar të shtënat, bashkëbiseduesi i tij i bllokoi dorën. Gjatë kësaj përplasjeje, arma u shkreh aksidentalisht, duke plagosur vetë personin që e mbante.

Policia dhe personeli i emergjencës mbërritën shpejt në vendngjarje. I plagosuri u dërgua menjëherë në spitalin San Raffaele të Milanos, ku mori ndihmën e nevojshme mjekësore. Raportohet se ai ka pësuar një plagë të lehtë, por ngjarja ka sjellë pasoja ligjore për të.

Autoritetet italiane kanë ngritur akuza ndaj 32-vjeçarit për kanosje të rëndë dhe për armëmbajtje pa leje. Hetimet mbi ngjarjen po vazhdojnë për të sqaruar rrethanat dhe motivet që çuan në këtë incident të dhunshëm.