Kryetari i Partisë Demokratike, Sali Berisha, u shpreh se në Shqipëri po zhvillohet tregtia e bitcoinit nën patronazhin e vëllait të kryeministrit, Olsi Rama.

Komentet Berisha i bëri nga foltorja e Kuvendit, teksa foli për projektin e Portit të Durrësit, që sipas tij është një vjedhje e madhe.

Ai shtoi se paratë e Portit të ri të Durrësit do të ndahen mes miqve të Edi Ramës dhe shqiptarët do të detyrohen të largohen nga vendi.

“Egnatia lidhej me Kostandinopojën. Sot ky port asgjësohet. Kapaciteti i tij është aktualisht 8 milion  tonë mall përpunim, ndërsa sot ka arritur në rreth 4.5 milion. Për qytetarët e Durrësit ka qenë porti që ata kanë siguruar kafshatën dhe jetesën. Sot klani Rama merr përsipër të përvetësojë 200 mijë metër katror. A e keni marrë vesh ju tregtinë që bëhet me bitcoinat nën patronazhin e Olsi Ramës. A ju kujtohet një deklaratë e Çelës që tha se pa energji po na lë bitcoini. E mbani mend me sa emergjencë erdhi këtu ligji i bitcoinit? Ato call centera të cilat ndiqeshin për calle në bursë janë nën hetim të plotë, ndërsa kto të bitconave kanë mbrojtje nga shteti. Do të mblidhen këtu mumuthët e Shqipërisë dhe të lindjes së mesme. Shqiptarët ose do të bëhen shërbëtorët e tyre ose do të largohen në Europë. Nga do të dalin këto 2 miliard euro? Pra këta këtu fitojnë 2 miliard euro, ndërsa shqiptarët këtu vuajnë pasojat. Nëse keni ndërgjegje kombëtare hidheni poshtë këtë marrëveshje. Shkel kushtetutën e Shqipërisë dhe Marrëveshjen e Stabilizim Asocimit”, u shpreh Berisha.